2018/04/30

എം.പി.ബാലകൃഷ്ണൻ മാഷ് അന്തരിച്ചു


എം.പി.ബാലകൃഷ്ണൻ 1936-2018
(കാലിക സമാചാരം)
സോഷ്യലിസ്റ്റ് നേതാവും ഗാന്ധിയനും വിദ്യാഭ്യാസ പ്രവർത്തകനുമായ എം.പി.ബാലകൃഷ്ണൻ തലശ്ശേരി പാലയാടിലെ ഡയറ്റിന് സമീപത്തെ ഡാലിയ എന്നു പേരുള്ള തന്റെ വീട്ടിൽ വച്ചു് 2018 ഏപ്രിൽ 28 ശനിയാഴ്ച അന്തരിച്ചു. പാലയാട് ഡയറ്റിന്റെ മുൻ പ്രിൻസിപ്പലും ചൊക്ലി രാമവിലാസം ഹൈസ്‌കൂളിലെയും പാലയാട് ട്രെയിനിങ് സ്‌കൂളിലെയും അധ്യാപകനും ചാവശ്ശേരി, അഴിയൂർ, പാലയാട് ഹൈസ്‌കൂളുകളിലെ പ്രഥമാധ്യാപകനുമായിരുന്നു അദ്ദേ
ഹം. 82 വയസ്സായിരുന്നു. പിറ്റേന്നു് ഏപ്രിൽ 29നു് ഉച്ചയ്ക്ക് 12ന് മൃതദേഹം വീട്ടിൽ നിന്നും എടുത്തു് അടുത്തുതന്നെയായ ചിറക്കുനിയിലെ തറവാട്ടു വീട്ടുപറമ്പിൽ സംസ്‌കരിച്ചു.

സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ, എ.എൻ.ഷംസീർ എംഎൽഎ, കെപിസിസി ജനറൽ സെക്രട്ടറിമാരായ പി.രാമകൃഷ്ണൻ, വി.എ.നാരായണൻ, സമാജവാദി ജനപരിഷത്ത് നേതാക്കളായ കെ.രമേശൻ, സ്‌നേഹാ രമേശ്, സർവോദയമണ്ഡലം നേതാക്കളായ കെ.പി.എ.റഹീം, തായാട്ട് ബാലൻ,ജനതാ ദൾ - സെക്കുലർ നേതാക്കളായ എം.കെ.പ്രേംനാഥ്, വി.കെ. കുഞ്ഞിരാമൻ, മനയത്ത് ചന്ദ്രൻ, ജനതാദൾ -യുണൈറ്റഡ് (ശരദ് യാദവ് വിഭാഗം) ജില്ലാ പ്രസിഡന്റ് കെ.പി.മോഹനൻ സിപിഐ കൺട്രോൾ കമ്മിഷൻ അംഗം സി.പി.മുരളി, യുഡിഎഫ് ജില്ലാ ചെയർമാൻ പ്രഫ. എ.ഡി.മുസ്തഫ, മണ്ഡലം ചെയർമാൻ സി.രഘുനാഥ്, ആർട്ടിസ്റ്റ് കെ.കെ.മാരാർ, മദ്യനിരോധന സമിതി നേതാവ് മാത്യു എം.കണ്ടത്തിൽ, ബാലസാഹിത്യകാരൻ ടികെഡി മുഴപ്പിലങ്ങാട്, രമാശക്തി മിഷൻ കേരള ഘടകം ജനറൽ സെക്രട്ടറി ടി.ഭാസ്‌കരൻ കാവുംഭാഗം തുടങ്ങിയവർ വീട്ടിലെത്തി അന്തിമോപചാരമർപ്പിച്ചു. സംസ്‌കാരത്തിന് ശേഷം പഞ്ചായത്ത് പ്രസിഡന്റ് സി.പി.ബേബി സരോജത്തിന്റെ അധ്യക്ഷതയിൽ അനുസ്മരണ യോഗവും ചേർന്നു.

ഉത്തരകേരളത്തിൽ അങ്ങോളമിങ്ങോളം സോഷ്യലിസ്റ്റ് ചിന്താഗതി പ്രചരിപ്പിക്കുന്നതിൽ എം.പി. വഹിച്ച പങ്ക് അവിസ്മരണീയമാണെന്നു് ജനതാദൾ - യുണൈറ്റഡ് (ശരദ് യാദവ് വിഭാഗം) സംസ്ഥാന പ്രസിഡന്റ് എം.പി.വീരേന്ദ്രകുമാർ എം.പി. കോഴിക്കോട്ടുനിന്നു് പുറപ്പെടുവിച്ച അനുശോചനസന്ദേശത്തിൽ പറഞ്ഞു. വിദ്യാഭ്യാസപ്രവർത്തകൻ, സാംസ്‌കാരിക പ്രവർത്തകൻ എന്നീ നിലകളിലെല്ലാം അദ്ദേഹം വ്യക്തിമുദ്ര പതിപ്പിച്ചുവെന്നും അനുശോചനസന്ദേശത്തിൽ പറയുന്നു. അവസാനനിമിഷം വരെ സോഷ്യലിസ്റ്റ് ആദർശത്തിനുവേണ്ടി നിലകൊണ്ട എം.പി.ബാലകൃഷ്ണന്റെ നിര്യാണം സോഷ്യലിസ്റ്റ് പ്രസ്ഥാനത്തിന് കനത്ത നഷ്ടമാണെന്ന് സമാജവാദിജനപരിഷത്ത് ദേശീയ നിർവാഹക സമിതിയംഗവും മുൻ ദേശീയ പ്രസിഡന്റുമായ ജോഷി ജേക്കബ്ബ് അനുസ്മരിച്ചു. സത്യസന്ധനും നിസ്വനും സ്‌നേഹസമ്പന്നനുമായ സോഷ്യലിസ്റ്റ് ആയിരുന്നു എം പി ബാലകഷ്ണൻ മാഷെന്നു് സംസ്ഥാന പ്രസിഡന്റ് വിനോദ് പയ്യട പറഞ്ഞു.

പരേതരായ എം.ചന്തുഗുരുക്കളുടെയും കെ.ശ്രീദേവിയമ്മയുടെയും മകനായി കണ്ണൂർ ജില്ലയിൽ തലശ്ശേരി താലൂക്കിലെ തലശ്ശേരി ബ്ലോക്കിൽ ധർമ്മടം ഗ്രാമപഞ്ചായത്തിന്റെ ഭാഗമായ ചിറക്കുനി-പാലയാട് ഗ്രാമത്തിൽ ജനിച്ചു വളർന്ന എം.പി.ബാലകൃഷ്ണൻ കുട്ടിക്കാലത്തുതന്നെ ഗാന്ധിമാർഗത്തിലേക്ക് ആകൃഷ്ടനായി. പിന്നീടു് സോഷ്യലിസ്റ്റ് ആശയങ്ങളുടെ പ്രചാരകനും ഡോ. രാമ് മനോഹര് ലോഹിയായുടെ അനുയായിയുമായി. സോഷ്യലിസ്റ്റ് പാർട്ടിയുടെ മുൻനിര പ്രസംഗകനായിരുന്നു. ജയപ്രകാശ്, ലോഹിയ തുടങ്ങിയ ദേശീയ സോഷ്യലിസ്റ്റ് നേതാക്കളുടെ പ്രസംഗം അദ്ദേഹം അനായാസമായി തർജമ ചെയ്യുമായിരുന്നു.

മനോഹരമായ ഭാഷയിൽ, ഏതു ഗഹനവിഷയങ്ങളിലും അനായാസമായി പ്രഭാഷണം നടത്തുമായിരുന്നു. ബി.എഡ്. വിദ്യാർഥിയായിരിക്കെ ചൊക്ലി രാമവിലാസം സ്‌കൂളിൽ പ്രസംഗിച്ചതുകേട്ട സ്‌കൂൾ മാനേജർ അദ്ദേഹത്തെ 'പഠനം കഴിഞ്ഞാൽ ഇവിടെത്തന്നെ അധ്യാപകനായി ചേരണം' എന്നു പറഞ്ഞു് അധ്യാപകവൃത്തിയിലേയ്ക്കു ക്ഷണിച്ചു. അധ്യാപകനായതോടെ രാഷ്ട്രീയപ്രവർത്തനം കുറച്ചു.

ഗാന്ധിയൻ പഠനവും അതിന്റെ പ്രയോഗവത്കരണവും അദ്ദേഹത്തിന്റെ പ്രവർത്തനമണ്ഡലത്തെ വ്യത്യസ്തമാക്കി. ഗാന്ധിയൻ തത്ത്വചിന്തയിലായിരുന്നു പി.ജി. ബിരുദം. ഗാന്ധിദർശൻ തലശ്ശേരി എന്ന കൂട്ടായ്മയ്ക്ക് രൂപം നൽകി. സ്‌കൂളുകൾ കേന്ദ്രീകരിച്ച് ഗാന്ധിയൻ പഠനക്ലാസുകൾക്ക് നേതൃത്വം നൽകി. എം.പി.യെന്നും ബാലകൃഷ്ണൻ മാഷെന്നും എല്ലാവരും സ്നേഹാദരങ്ങളോടെ വിളിച്ചിരുന്ന എം.പി ബാലകൃഷ്ണൻ പകൽ സ്‌കൂളിലെ മാഷും അതുകഴിഞ്ഞാൽ സമൂഹത്തിലെ മാഷുമായിരുന്നു. എം.പി. എന്ന വിളിപ്പേരായിരുന്നു ആദ്യകാസഹപ്രവർത്തകർ അദ്ദേഹത്തിനു് നല്കിയതു്.

സ്‌കൂൾ പ്രവൃത്തിദിനങ്ങൾ, അവധിക്കാല പാഠ്യേതര പ്രവർത്തനങ്ങൾ എന്നിവയെക്കുറിച്ച് പഠിക്കാൻ 1968-ൽ സംസ്ഥാന സർക്കാർ നിയോഗിച്ച കമ്മിഷൻ അംഗമായിരുന്നു എം.പി.ബാലകൃഷ്ണൻ. ഡിപ്പാർട്ട്മെന്റൽ ഗ്രാജ്വേറ്റ് ടീച്ചേഴ്സ് അസോസിയേഷൻ സംസ്ഥാന സെക്രട്ടറിയായിരുന്നു. സർക്കാർജീവനക്കാരുടെ നിരവധി സമരങ്ങൾക്ക് നേതൃത്വം നൽകിയിട്ടുണ്ട്. കോഴിക്കോട് സർവകലാശാല സെനറ്റംഗവും കണ്ണൂർ സർവകലാശാല രൂപവത്കരണത്തിന്റെ ഭാഗമായ വിഷയനിർണയ സമിതി അംഗവുമായിരുന്നു.

കണ്ണൂർ മഹാത്മാ മന്ദിരം, തലശ്ശേരി ഗുണ്ടർട്ട് ഫൗണ്ടേഷൻ, ഗാന്ധിദർശൻ, തലശ്ശേരി ബുക്ക് ക്ലബ്ബ് എന്നിവയുടെ സംഘാടകനും ഭാരവാഹിയുമായിരുന്നു. കേരള സർവോദയസംഘം, മദ്യനിരോധന സമിതി എന്നിവയുടെ നേതൃനിരയിൽ പ്രവർത്തിച്ചിട്ടുണ്ട്. മയ്യഴി വിപ്ലവ അനുസ്മരണ സമിതിയുടെ രക്ഷാധികാരിയുമായിരുന്നു.

സാമൂഹികപ്രവർത്തനത്തിന് എം.പി.മന്മഥൻ അവാർഡ്, സർദാർ ചന്ത്രോത്ത് അവാർഡ്, പി.കുഞ്ഞിരാമൻ വക്കീൽ അവാർഡ് എന്നിവ ലഭിച്ചിട്ടുണ്ട്.

പ്രമുഖ സോഷ്യലിസ്റ്റും സ്വാതന്ത്ര്യ സമര നേതാവുമായിരുന്ന യൂസഫ് മെഹറലിയുടെ ജീവചരിത്രം മലയാളത്തിലേക്ക് പരിഭാഷപ്പെടുത്തിയിട്ടുണ്ട്. വിവിധ ആനുകാലികങ്ങളിൽ ലേഖനങ്ങളും കവിതകളും എഴുതിയിട്ടുണ്ട്.

ഭാര്യ കെ.പ്രഭ പാലയാട് ഹൈസ്‌കൂൾ റിട്ട. അധ്യാപികയാണ് . മക്കളില്ല.
സഹോദരങ്ങൾ രാഘവൻ (കനറാ ബാങ്ക് റിട്ട. ഉദ്യോഗസ്ഥൻ), മാലതി (മുംബൈ), ലക്ഷ്മിക്കുട്ടി (കൂടാളി), പത്മനാഭൻ (മുംബൈ), ദാമോദരൻ, രവീന്ദ്രകുമാർ, രഞ്ജിനി (ചാല) എന്നിവരാണു്.



2018/04/04

സോഷ്യലിസ്റ്റ് നേതാവ് ഭായി വൈദ്യ അന്തരിച്ചു


ഭായി വൈദ്യ (1928 ജൂൺ 22 ‍– 2018 ഏപ്രിൽ 2)
(ചിത്രം: എബി ജോൺ വൻനിലം, മാവേലിരാജ്യം
(CC BY-SA 2.5 IN)
രാജ്യത്തെ പ്രമുഖ സോഷ്യലിസ്റ്റ് നേതാവും മുൻ മഹാരാഷ്ട്ര അഭ്യന്തരമന്ത്രിയും പുണെനഗരത്തിന്റെ മുൻമേയറുമായ ഭായി വൈദ്യ (भाई वैद्य) 2018 ഏപ്രിൽ 2 തിങ്കളാഴ്ച രാത്രി ഏഴരകഴിഞ്ഞപ്പോൾ മഹാരാഷ്ട്ര സംസ്ഥാനത്തിലെ പുണെനഗരത്തിലെ ഒരു സ്വകാര്യആശുപത്രിയിൽ വച്ച് അന്തരിച്ചു. അർബുദബാധയെത്തുടർന്ന് പൂന ആശുപത്രിയിൽ ചികിത്സയിലായിരുന്ന അദ്ദേഹത്തിനു് 89 വയസ്സുണ്ടായിരുന്നു.

അഭിജിത് വൈദ്യ എന്നമകനും പ്രാചി റാവൽ എന്ന മകളും കൊച്ചുമകനും കൊച്ചുമകളുമുണ്ടു്. അന്തിമകർമങ്ങൾ നടത്തുന്നതുനുമുമ്പു് മൃതശരീരം രാഷ്ട്രസേവാദള ആസ്ഥാനമായ സാനെഗുരുജിസ്മാരകത്തിൽ പൊതുദർശനത്തിനു വച്ചപ്പോൾ ജീവിതത്തിന്റെനാനാതുറകളിൽ പെട്ടവർ അന്ത്യോപചാരം അർപ്പിച്ചു. ഏപ്രിൽ 3 ചൊവ്വാഴ്ച വൈകീട്ട് പുണെയിലെ വൈകുണ്ഠ ശ്മശാനത്തിൽ ഔദ്യോഗിക ബഹുമതികളോടെ നടന്ന അന്ത്യകർമങ്ങളിൽ രാഷ്ട്രീയ-സാംസ്‌കാരിക നേതാക്കൾ ഉൾപ്പെടെ ഒട്ടേറെപ്പേർ പങ്കെടുത്തു.

സോഷ്യലിസ്റ്റ് നേതാവു് എസ്.എം. ജോഷിയുടെ അടുത്ത അനുയായിയായിയായിരുന്ന ഭായി വൈദ്യയുടെ യഥാർത്ഥ പേരു് ബാലചന്ദ്ര സദാശിവ വൈദ്യ (भालचंद्र सदाशिव वैद्य) എന്നായിരുന്നു. 1928 ജൂൺ 22 മഹാരാഷ്ട്ര സംസ്ഥാനത്തെ പുണെ ജില്ലയിലെ വേല്‌ഹേ താലൂക്കിലെ ദാപോഡെ ഗ്രാമത്തിൽ ജനിച്ച അദ്ദേഹം സാമൂഹിക ശാസ്ത്രത്തിലും രാഷ്ട്രതന്ത്രത്തിലും ബിരുദാനന്തരബിരുദം നേടി.

പതിനാലുവയസ്സുള്ളപ്പോൾ ക്വിറ്റ് ഇന്ത്യാ പ്രക്ഷോഭത്തിൽ പങ്കെടുത്താണ് അദ്ദേഹം പൊതുപ്രവർത്തനത്തിന് തുടക്കമിട്ടത്. 1955ൽ സോഷ്യലിസ്റ്റ് പാർട്ടി നേതാവു് ഡോ. റാം മനോഹർ ലോഹിയാ നയിച്ച ഗോവ വിമോചനസമരത്തിലും 1957ൽ എസ്.എം. ജോഷി നയിച്ച സംയുക്ത മഹാരാഷ്ട്ര പ്രസ്ഥാനത്തിലും 1968-ൽ സംയുക്ത സോഷ്യലിസ്റ്റ് പാർട്ടി നയിച്ച കച്ച് സത്യാഗ്രഹത്തിലും 1974ൽ ലോകനായക ജയപ്രകാശ് നാരായണൻ നയിച്ച സമ്പൂർണ വിപ്ലവ പ്രസ്ഥാനത്തിലും പങ്കുകൊണ്ടു.

1943-ൽ അദ്ദേഹം രാഷ്ട്രസേവാദളത്തിൽ (ആർ.എസ്.ഡി) ചേർന്നു. 1946-ൽ കാങ്ഗ്രസ്സ് സോഷ്യലിസ്റ്റ് പാർട്ടിയിൽ അംഗമായ അദ്ദേഹം 1948-52 കാലത്ത് സോഷ്യലിസ്റ്റ് പാർട്ടിയിലും 1952-55 കാലത്ത് പ്രജാ സോഷ്യലിസ്റ്റ് പാർട്ടിയിലും 1955-64 കാലത്ത് സോഷ്യലിസ്റ്റ് പാർട്ടിയിലും1964-71 കാലത്ത് സംയുക്ത സോഷ്യലിസ്റ്റ് പാർട്ടിയിലും 1971-77 കാലത്ത് സോഷ്യലിസ്റ്റ് പാർട്ടിയിലും 1977-88 കാലത്ത് ജനതാ പാർട്ടിയിലും 1988-90 കാലത്ത് ജനതാദളത്തിലും 1990-91 കാലത്ത് ജനതാദളം (സോഷ്യലിസ്റ്റ്) ലും 1991-93 കാലത്ത് സമാജവാദി ജനതാ പാർട്ടിയിലും 1993-95 കാലത്ത് സോഷ്യലിസ്റ്റ് ഫ്രണ്ടിലും 1995-2011 കാലത്ത് സമാജവാദി ജനപരിഷത്തിലും തുടർന്നു. അദ്ദേഹം 2011ൽ സമാജവാദി ജനപരിഷത്ത് വിട്ട് സോഷ്യലിസ്റ്റ് പാർട്ടി (ഇന്ത്യ) രൂപവൽക്കരിച്ച് അതിന്റെ ആദ്യപ്രസിഡന്റായി.

1986 മുതൽ 1988 വരെ ജനതാ പാർട്ടി ദേശീയ ജനറൽ സെക്രട്ടറിയും 1995മുതൽ 99 വരെ സമാജവാദി ജനപരിഷത്ത് ദേശീയ ജനറൽ സെക്രട്ടറിയും 1999 മുതൽ 2001 വരെ സമാജവാദി ജനപരിഷത്ത് ദേശീയ വൈസ് പ്രസിഡന്റും 2001ൽ രാഷ്ട്രസേവാദളം (ആർ.എസ്.ഡി) പ്രസിഡന്റും 2011 മുതൽ 2016 വരെ സോഷ്യലിസ്റ്റ് പാർട്ടി (ഇന്ത്യ) ദേശീയ പ്രസിഡന്റും ആയി അദ്ദേഹം സേവനമനുഷ്ഠിച്ചു.

1967മുതൽ 1978 വരെ പുണെ മുനിസിപ്പൽ കോർപ്പറേഷൻ കൗൺസിലറും 1974-75ൽ മേയറുമായിരുന്നു. പുണെ നഗരത്തിന്റെ മേയറായിരിയ്ക്കവെ സമ്പൂർണ വിപ്ലവ പ്രക്ഷോഭകാരിയായ ലോകനായക ജയപ്രകാശ് നാരായണന് സ്വീകരണം നല്കിയതു് ഇന്ത്യയാകെ ശ്രദ്ധിച്ച സംഭവമായിരുന്നു. 1975ൽ പുണെ മേയറായിരിയ്ക്കവെ തന്നെ അടിയന്തരാവസ്ഥയ്‌ക്കെതിരെ 20,000 പേരുടെ ജനകീയറാലി സംഘടിപ്പിച്ചു് അറസ്റ്റ് വരിച്ച അദ്ദേഹം അടിയന്തരാവസ്ഥക്കാലം മുഴുവൻ ജയിലിലായിരുന്നു.

1978ൽ ജനതാ പാർട്ടി സ്ഥാനാർത്ഥിയായി ഭവാനി പേഠ് വിധാൻ സഭാമണ്ഡലത്തിൽനിന്നു് മൽസരിച്ച് ഭായി വൈദ്യ മഹാരാഷ്ട്ര നിയമസഭാംഗമായി. 1978-80 കാലത്ത് ശരദ് പവാർ നയിച്ച പുരോഗമന ജനാധിപത്യ മുന്നണി (പ്രോഗ്രസ്സീവ് ഡെമോക്രാറ്റിക് ഫ്രണ്ട് - പി.ഡി.എഫ്.) സർക്കാരിലെ ആഭ്യന്തരമന്ത്രിയായി. ഇന്ത്യയിൽ ആദ്യമായി പോലീസുകാരുടെ വേഷം നിക്കറിനു പകരം പാന്റാക്കിയ പരിഷ്‌കാരം വരുത്തിയത് ഭായി വൈദ്യയായിരുന്നു. അക്കാലത്തൊരിയ്ക്കൽ കള്ളക്കടത്തുകാർ നല്കിയ വലിയ കൈക്കൂലി നിരസിച്ച് അവരെ തുറുങ്കിലടച്ചതു് സത്യസന്ധതയും അഴിമതിയോടുള്ള സന്ധിയില്ലാത്ത മനോഭാവത്തിന്റെ സാക്ഷ്യവുമായി വാഴ്ത്തപ്പെട്ടിരുന്നു.

മുംബൈ തലസ്ഥനമായ മറാഠ ഭാഷാ സംസ്ഥാനത്തിനുവേണ്ടി1957ൽ നടത്തിയ സമരമായ സംയുക്ത മഹാരാഷ്ട്ര പ്രസ്ഥാനത്തിൽ പങ്കെടുത്തു് മൂന്നാഴ്ചയും അടിയന്തരാവസ്ഥക്കാലത്തു് 19 മാസവും ജയിലിൽ കിടന്ന അദ്ദേഹം വിവിധ പ്രക്ഷോഭങ്ങളിൽ പങ്കെടുത്തു് 25 വട്ടമാണു് ജയിൽ വാസം അനുഭവിച്ചിട്ടുള്ളതു്. എ.ആർ. ആന്തുലെയ്ക്കു് കുറ്റപത്രം നല്കണമെന്നു്ആവശ്യപ്പെട്ടും കർഷക അവകാശങ്ങൾക്കുവേണ്ടിയും വിദ്യാഭ്യാസ അവകാശങ്ങൾക്കുവേണ്ടിയും എൻറോൺ കമ്പനിയ്‌ക്കെതിരെയും ആയി നടന്നതടക്കം നിരവധി രാഷ്ട്രീയ സാമൂഹിക പ്രക്ഷോഭങ്ങളുടെ നേതാവായിരുന്നു. 1983 ൽ ജനതാപാർട്ടി നേതാവു് ചന്ദ്രശേഖർ ഭാരതയാത്രയെന്ന പേരിൽ ദെല്ഹിയിൽ നിന്നു് കന്യാകുമാരിവരെ നടത്തിയ 4000 കിലോമീറ്റർ പദയാത്രയിൽ അദ്ദേഹം ആദ്യാവസാനം വരെ പങ്കെടുത്തു.

2018/03/26

ആദിവാസികളുടെ അവശേഷിക്കുന്നതും ഉദാരീകരണം കവർന്നെടുക്കും: ഷമീംമോദി



ഉദാരവൽക്കരണ നയങ്ങളുടെ കാലഘട്ടത്തിൽ ആദിവാസി ജനതയുടെ പ്രതിസന്ധികൾ എന്നവിഷയത്തിൽ സമാജവാദി ജനപരിഷത്ത് കേരളസംസ്ഥാനസമിതിയുടെ ആഭിമുഖ്യത്തിൽ 2018 മാർച്ച് 24 നു് തിരുവനന്തപുരം പ്രസ്സ്‌ക്ലബ് ഹാളിൽ സംഘടിപ്പിച്ച ഡോ. റാം മനോഹർ ലോഹിയാ ജന്മവാർഷിക പരിപാടിയിൽ മദ്ധ്യപ്രദേശസംസ്ഥാനത്തെ സോഷ്യലിസ്റ്റ് നേതാവും മുംബൈ ടാറ്റാ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസിലെ ഫെലോയുമായ ഷമിം മേഘാനി മോദി സംസാരിയ്ക്കുന്നു. ഷീലാ ജഗധരൻ, സമാജവാദി ജനപരിഷത്ത് ദേശീയ നിർവാഹക സമിതിയംഗവുമായ ജോഷി ജേക്കബ്, നെയ്യാറ്റിൻകര ബിനു, കേരള ഹിസ്റ്ററി കോൺഗ്രസ്സ് ജനറൽ സെക്രട്ടറി ഡോ.എൻ.വി. ഗോപകുമാർ, അഡ്വ. ജയ്മോൻ തങ്കച്ചൻ, ഫ്രാൻസിസ് ഞാളിയൻ, കോവളം സുകുമാരി എന്നിവർ സമീപം.


തിരുവനന്തപുരം, മാർച്ച് 24 (കാലിക സമാചാരം) -
ആദിവാസികളുടെ അവശേഷിക്കുന്നതും ഉദാരീകരണം നയം മൂലം കവർന്നെടുക്കുമെന്ന് മദ്ധ്യപ്രദേശസംസ്ഥാനത്തെ സോഷ്യലിസ്റ്റ് നേതാവും മുംബൈ ടാറ്റാ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസിലെ ഫെലോയുമായ ഷമിം മേഘാനി മോദി അഭിപ്രായപ്പെട്ടു. ഉദാരവൽക്കരണ നയങ്ങളുടെ കാലഘട്ടത്തിൽ ആദിവാസി ജനതയുടെ പ്രതിസന്ധികൾ എന്നവിഷയത്തിൽ സമാജവാദി ജനപരിഷത്ത് കേരളസംസ്ഥാനസമിതിയുടെ ആഭിമുഖ്യത്തിൽ 2018 മാർച്ച് 24 നു് തിരുവനന്തപുരം പ്രസ്സ്‌ക്ലബ് ഹാളിൽ സംഘടിപ്പിച്ച ഡോ. റാം മനോഹർ ലോഹിയാ ജന്മവാർഷിക പരിപാടിയിൽ സംസാരിയ്ക്കുകയായിരുന്നു അവർ.

ഉദാരവല്ക്കരണനയങ്ങളുടെഏറ്റവും വലിയഇരയായിമാറിയതു് ആദിവാസികളാണെന്നു് ഷമിം മോദി ചൂണ്ടിക്കാട്ടി. ഇന്ത്യ ഉദാരവൽക്കരണനയം സ്വീകരിച്ചതിനുശേഷമുള്ള ഏറ്റവും കൂടുതൽ വിദേശനിക്ഷേപവാഗ്ദാനമുണ്ടായതു് ഇരുമ്പ് ഐരു് ബോക്‌സൈറ്റ് ഖനനപദ്ധതികൾക്കായിരുന്നു. ഈ ഖനനപദ്ധതികൾക്കായി വിട്ടുകൊടുക്കുവാൻ കണ്ടെത്തിയതാകട്ടെ ബിഹാർ, ഝാർഖണ്ഡ്, ഛത്തീസ്ഗഢ് ഉഡീസ സംസ്ഥാനങ്ങളിലെ ആദിവാസി മേഖലകളും വനങ്ങളുമായിരുന്നു. ആദിവാസികളെ ബലമായി കുടിയോഴിപ്പിച്ചു് ധാതുവിഭവങ്ങളും വനവിഭവങ്ങളും ചുളുവിലയ്ക്കു കടത്തി ലാഭം കൊയ്യാൻ വ്യവസായികളും അവർക്കു് ഒത്താശ ചെയ്തു് വീതം പറ്റാൻ രാഷ്ട്രീയ- ഉദ്യോഗസ്ഥ പരിഷകളും ഉണ്ടാക്കിയ കൂട്ടുകെട്ടു് ആദിവാസിജനതകളുടെ ജീവിതം നരകതുല്യമാക്കിയെന്നു് ഷമിം മോദി പറഞ്ഞു. ഈ അനീതികൾക്കെതിരെ ജനാധിപത്യപരവും ഭരണഘടനാപരവുമായ മാർഗങ്ങളിലൂടെ നടന്ന നിയമഗിരി മലകളിലെ ചെറുത്തുനില്പിന്റെയും പോസ്‌കോ പദ്ധതിവിരുദ്ധസമരത്തിന്റെയും വിജയങ്ങൾ ലോകശ്രദ്ധനേടിയവയാണു്. ആദിവാസികളുടെ ജനാധിപത്യപരവും ഭരണഘടനാപരവുമായ മാർഗങ്ങളിലൂടെയുള്ള ചെറുത്തുനില്പിനുപകരം അവരെ സായുധസമര മാർഗങ്ങളിലേയ്ക്കു് തിരിച്ചുവിട്ട് സ്വാധീനമുണ്ടാക്കാൻ മാവോവാദികൾ ശ്രമിയ്ക്കുന്നതിനെയും മാവോവാദികളല്ലാത്ത ആദിവാസികളെയും അവരുടെ സമരങ്ങളെയും മാവോവാദികളെന്നുമുദ്രകുത്തി അടിച്ചമർത്തുന്ന ഭരണകൂടഭീകരതയെയും ആദിവാസിജനത നേരിടേണ്ടിവരുന്നു. ഇന്ത്യയുടെ ജനാധിപത്യഭരണഘടനയിലെ ആദിവാസിസംരക്ഷണമുറപ്പുവരുത്തുന്ന വകുപ്പുകൾ ഉപയോഗപ്പെടുത്തിക്കൊണ്ടു് ആദിവാസികൾ ഇപ്പോഴത്തെ പ്രതിസന്ധികളെ അതിജീവിയ്ക്കണമെന്നു് ഷമിം മോദി ആഹ്വാനം ചെയ്തു.

പ്രമുഖ സോഷ്യലിസ്റ്റ് നേതാവും സമാജവാദി ജനപരിഷത്ത് ദേശീയ നിർവാഹക സമിതിയംഗവുമായ ജോഷി ജേക്കബ് അദ്ധ്യക്ഷനായിരുന്നു. ദേശീയ മൽസ്യത്തൊഴിലാളി ഫോറം ജനറൽ സെക്രട്ടറി ടി. പീറ്റർ, കേരള ഹിസ്റ്ററി കോൺഗ്രസ്സ് ജനറൽ സെക്രട്ടറി ഡോ.എൻ.വി. ഗോപകുമാർ,കേരള കർഷക മുന്നണി സെക്രട്ടറി ഷീലാ ജഗധരൻ, ഫ്രാൻസിസ് ഞാളിയൻ, സി.സാവിത്രി, ബി.അയ്യപ്പൻ, കോവളം സുകുമാരി, മുരളിധരൻപിള്ള എന്നിവർ പ്രസംഗിച്ചു. തിരുവനന്തപുരം ജില്ലാ കൺവീനർ നെയ്യാറ്റിൻകര ബിനു സ്വാഗതവും, അഡ്വ. ജയ്മോൻ തങ്കച്ചൻ കൃതജ്ഞതയും പറഞ്ഞു. (കാലിക സമാചാരം, 2018 മാർച്ച് 24)
-0-




ജീവിയ്ക്കുന്ന രക്തസാക്ഷി

ഭർത്താവ് അനുരാഗ മോദിയോടൊപ്പം ശ്രമിക് ആദിവാസി സംഘടന സംഘടിപ്പിച്ചു് ആദിവാസികൾക്ക് വനത്തിലും മണ്ണിലും വെള്ളത്തിലുമുള്ള അവകാശത്തിനു വേണ്ടി 27 വർഷമായി പൊരുതിക്കൊണ്ടിരിക്കുന്ന സാമൂഹിക പ്രവർത്തകയാണു് ഷമിം മോദി (शमीम मोदी). 2009 ൽ ഉണ്ടായ വധശ്രമത്തെ മാരകമായ പരിക്കുകളോടെ അതിജീവിച്ച ഷമിം മോദി ജീവിയ്ക്കുന്ന രക്തസാക്ഷിയാണു്.
ആദിവാസി ഗോത്രജനങ്ങളുടെയും തൊഴിലാളികളുടെയും കേസുകൾ മദ്ധ്യപ്രദേശ് ഹൈക്കോടതിയിൽ നടത്തിയ അവർ ആദിവാസി ഗോത്രക്കാരെ അവരുടെ അവകാശങ്ങളെപ്പറ്റി പഠിപ്പിക്കുകയും അവരുടെ ക്ഷേമത്തിനു വേണ്ടി തന്റെ സംഘടനയിലൂടെ പ്രവർത്തിക്കുകയും ചെയ്തു

മഹാത്മാ ഗാന്ധിയുടെയും ലോകനായക് ജയപ്രകാശ് നാരായണന്റെയും ഡോ. അംബേഡ്കരിന്റെയും റാം മനോഹർ ലോഹിയയുടെയും ആദർശങ്ങൾക്കു വേണ്ടി പ്രവർത്തിയ്ക്കുന്ന ജനാധിപത്യ പ്രസ്ഥാനമായ സമാജവാദി ജനപരിഷത്തിന്റെ മദ്ധ്യപ്രദേശ് സംസ്ഥാന നേതാവാണു്. രണ്ടു് പ്രാവശ്യം നിയമസഭാ തെരഞ്ഞെടുപ്പിൽ മുൻ റവന്യൂ മന്ത്രി കമൽപട്ടേലിനെതിരെയും ഒരു പ്രാവശ്യം ലോകസഭാ തെരഞ്ഞെടുപ്പിലും മൽസരിച്ചു.

രാഷ്ട്രീയ പ്രവർത്തകരും ഉദ്യോഗസ്ഥ ഭരണക്കാരും തമ്മിലുള്ള അഴിമതി കൂട്ടുകെട്ട് ശ്രമിക് ആദിവാസി സംഘടനയും സമാജവാദിജന പരിഷത്തും പുറത്തു കൊണ്ടു വന്നു. ആദിവാസി ഗോത്രക്കാർക്ക് നേരെയുള്ള ക്രൂരതകളും ഖനന മാഫിയയും വനമാഫിയയുമായി സംസ്ഥാനത്ത് ഭരണത്തിലുള്ള ഭാരതീയ ജനതാപാർട്ടിയ്ക്കുള്ള ബന്ധവും ചൂണ്ടിക്കാട്ടി ഷമിം മോദി ജബൽപുർ ഹൈക്കോടതിയിൽ 4644-ആം നമ്പരായി ഒരു പൊതു താൽപര്യ ഹർജി (public interest litigation [PIL]) ഫയൽ ചെയ്തതു് ശ്രദ്ധിയ്ക്കപ്പെട്ട സംഭവമായിരുന്നു. താൻ അറസ്റ്റു് ചെയ്യപ്പെട്ടേക്കാം എന്ന ഭയം പൊതു താൽപര്യ ഹർജിയിൽ ഉടനീളം ഷമീം വ്യക്തമാക്കിയിരുന്നതിനാൽ ഷമിമിന്റെ ജീവിതത്തിനും സ്വാതന്ത്ര്യത്തിനും എതിരെയുള്ള ഭീഷണി പരിഗണിച്ച് ഹർജി തീർപ്പാക്കുന്നതു വരെ ഷമിമിനെ അറസ്റ്റ് ചെയ്യുന്നത് ഹൈക്കോടതി വിലക്കുകയും 2 സായുധ കാവൽക്കാരെ ഏർപ്പാടാക്കുകയും ചെയ്തിരുന്നു. 2008 ജൂലായ് 17 ന് ഈ പൊതു താൽപര്യ ഹർജിയിൽ ഹൈക്കോടതി ഉത്തരവായി. പോലീസ് കയ്യാമം വച്ച ആദിവാസി ഗോത്രക്കാരായ മൂന്ന് പേർക്കും നഷ്ടപരിഹാരം നൽകാൻ വിധിക്കുകയും പുതിയ ട്രൈബൽ റൈറ്റ് നിയമപ്രകാരമുള്ള വേരിഫിക്കേഷൻ നടപടിക്രമം കഴിയുന്നതുവരെ ആദിവാസി ഗോത്രക്കാരെ വനഭൂമിയിൽ നിന്ന് നീക്കം ചെയ്യരുതെന്നും അനധികൃത ഖനനത്തിലേർപ്പെട്ടിരിക്കുന്നവർക്കെതിരെ നടപടിയെടുക്കണമെന്നും ഉത്തരവാവുകയും ചെയ്തു. ഒരു നടപടിയും ഉണ്ടാകാത്തതിന്റെപേരിൽ ഷമിം കോടതിലക്ഷ്യ പരാതി നൽകിയപ്പോൾ രാഷ്ട്രീയ പ്രേരിതമായി ചുമത്തിയ കേസുകളുടെ പേരിൽ 2009 ഫെബ്രുവരിയിൽ ഷമിമിനെ അറസ്റ്റു് ചെയ്ത് 22 ദിവസം തടവറയിലടച്ചു.

2003-ലെ നിയമസഭാ തെരെഞ്ഞെടുപ്പിൽ ഭാരതീയ ജനതാ പാർട്ടി നേതാവ് കമൽ പട്ടേലിനെതിരെ (സംസ്ഥാന മുൻ റവന്യു മന്ത്രി) മത്സരിച്ചതുതൊട്ട് പോലീസ് ഷമിനെ വേട്ടയാടിത്തുടങ്ങിയതു്. തെരെഞ്ഞെടുപ്പു ഫലം പ്രഖ്യാപിച്ചയുടനെ തന്നെ 2003-ൽ ഷമിമിനെ പോലിസ് അറസ്റ്റു് ചെയ്തിട്ടു് മൂന്നു് ദിവസം കഴിഞ്ഞാണു് മോചിപ്പിച്ചതു്. 2009 ഫെബ്രുവരിയിലെ തടങ്കലും നിയമസഭാതെരഞ്ഞെടുപ്പുകഴിഞ്ഞയുടനെയായിരുന്നു. 2009 ജൂലൈ 23-ആം തീയതി മുംബൈയിലെ വസായിയിൽ വച്ചു് ഫ്‌ലറ്റിന്റെ വാച്ച്മാൻ കത്തികൊണ്ടു് കുത്തി കൊലപ്പെടുത്താൻശ്രമിച്ചു. മാരകമായ പരിക്കേറ്റ അവർ മരിച്ചെന്നുകരുതിയാണു് അക്രമി ഉപേക്ഷിച്ചുപോയതു്.

11--ആം പഞ്ചവത്സര പദ്ധതിയുടെ തയ്യാറെടുപ്പിനായുള്ള ട്രൈബൽ സബ് ഗ്രൂപ്പിലെ അംഗം, പേരുകേട്ട സാമൂഹിക പ്രവർത്തകനായിരുന്ന ബാബ ആംട്ടെയോടും മേധാപട്ക്കറോടുമൊപ്പം ജനസഹയോഗ് ട്രസ്റ്റിലെ ഒരു ട്രസ്റ്റി തുടങ്ങിയ നിലകളിലൊക്കെ അവർ പ്രവർത്തിച്ചിട്ടുണ്ടു്.

ദില്ലിയിലെ ലേഡി ശ്രീറാം കോളേജിൽ നിന്ന് ബിരുദാനന്തര ബിരുദവും മുംബൈയിലെ ടാറ്റാ ഇൻസ്‌റിറ്റിയൂട്ട് ഓഫ് സോഷ്യൽ സയൻസസ് (TISS) ൽ നിന്ന് എംഫിലും ഭോപാൽ സർവകലാശാലയിൽ നിന്ന് നിയമബിരുദവും നേടിയിട്ടുള്ള അഭിഭാഷകകൂടിയായ ഷമിമിന് 55 വയസ്സുണ്ട്.
--(കാലിക സമാചാരം, 2018 മാർച്ച് 24)


2018/03/23

ഡോ. റാം മനോഹർ ലോഹിയാ ജന്മവാർഷിക പ്രഭാഷണം തിരുവനന്തപുരത്ത്


ഷമിം മോദി (ഫയൽ ഫോട്ടോ)

തിരുവനന്തപുരം, 2018 മാർച്ച് 24 (കാലിക സമാചാരം) — സോഷ്യലിസ്റ്റ് നേതാവും മുംബൈ ടാറ്റാ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസിലെ ഫെലോയുമായ ഷമിം മേഘാനി മോദി 2018 മാർച്ച് 24 ഉച്ചകഴിഞ്ഞ് നാലുമണിയ്ക്കു് തിരുവനന്തപുരം പ്രസ്സ്‌ക്ലബ് ഹാളിൽ ഡോ. റാം മനോഹർ ലോഹിയാ ജന്മവാർഷിക പ്രഭാഷണം നടത്തും. നവഉദാരവല്ക്കരണകാലഘട്ടത്തിൽ ആദിവാസിജനതയുടെ പ്രതിസന്ധികൾ എന്ന വിഷയത്തെ അധികരിച്ച് സമാജവാദി ജനപരിഷത്തിന്റെ ആഭിമുഖ്യത്തിൽ സംഘടിപ്പിച്ചിട്ടുള്ള പ്രഭാഷണ പരിപാടി സമാജവാദി ജനപരിഷത്ത് ദേശീയ സചിവൻ അനുരാഗ് മോദി ഉദ്ഘാടനം ചെയ്യും.

പ്രമുഖ സോഷ്യലിസ്റ്റ് നേതാവും സമാജവാദി ജനപരിഷത്ത് ദേശീയ നിർവാഹക സമിതിയംഗവുമായ ജോഷിജേക്കബ് അദ്ധ്യക്ഷത വഹിയ്ക്കും. കേരള ഹിസ്റ്ററി കോൺഗ്രസ്സ് ജനറൽ സെക്രട്ടറി ഡോ.എൻ.വി. ഗോപകുമാർ, ദേശീയ മൽസ്യത്തൊഴിലാളി ഫോറം ജനറൽ സെക്രട്ടറി ടി. പീറ്റർ, ജനതാ ദളം യുണൈറ്റഡ് മുൻ സംസ്ഥാന കമ്മിറ്റിയംഗം മലയിൻകീഴ് ശശികുമാർ, കേരള കർഷക മുന്നണി സെക്രട്ടറി ഷീലാ ജഗധരൻ, ഫ്രാൻസിസ് ഞാളിയൻ, ജയ്‌മോൻ തങ്കച്ചൻ, ജനപരിഷത്ത് സംസ്ഥാന സെക്രട്ടറി എം എൻ തങ്കപ്പൻ, ദലിത ക്രൈസ്തവ മുന്നേറ്റ നേതാവു് പി.ഒ പീറ്റർ, ഷാജിമോൻ പി.കെ. , നെയ്യാറ്റിൻകര ബിനു എന്നിവർ സംസാരിയ്ക്കും.

ഡോ. റാം മനോഹർ ലോഹിയാ 108ആമത് ജന്മവാർഷികം മാർച്ച് 23നായിരുന്നു.

___

2018/01/03

സംവരണം സാമൂഹിക സമത്വം കൈവരിക്കുന്നതിന്: അഡ്വ.ജോഷി ജേക്കബ്


സമാജവാദി ജനപരിഷത്തിന്റെ ആഭിമുഖ്യത്തിൽ നടന്ന സെക്രട്ടറിയേറ്റ് 
സത്യാഗ്രഹം സമാജവാദി ജനപരിഷത്ത് മുൻ ദേശീയ അദ്ധ്യക്ഷൻ 
അഡ്വ. ജോഷി ജേക്കബ് ഉദ്ഘാടനം ചെയ്യുന്നു. സംസ്ഥാന ജനറൽ 
സെക്രട്ടറി എബി ജോൺ വൻനിലം തിരുവനന്തപുരം ജില്ലാ കൺവിനർ 
നെയ്യാറ്റിൻകര ബിനു, സംസ്ഥാന വൈസ് പ്രസിഡന്റ് എം.എൻ.തങ്കപ്പൻ 
എന്നിവർ സമീപം.
തിരുവനന്തപുരം, 2018 ജനുവരി 1: സാമൂഹിക സമത്വം കൈവരിക്കുന്നതിനാണ് സംവരണമെന്നും എന്നാൽ സംവരണത്തിനുള്ളിൽ ഉരുത്തിരിഞ്ഞിട്ടുള്ള അസന്തുലിതാവസ്ഥയും അസമത്വവും പരിഹരിച്ച് സംവരണത്തെ കൂടുതൽ ചലനാത്മകമാക്കണമെന്നും സമാജവാദി ജനപരിഷത്ത് മുൻ ദേശീയ അദ്ധ്യക്ഷനും ദേശീയ നിർവാഹക സമിതിയംഗവുമായ അഡ്വ. ജോഷി ജേക്കബ്ബ് അഭിപ്രായപ്പെട്ടു. പിണറായി സർക്കാരിന്റെ മുന്നാക്ക സമുദായ സംവരണ നയം സംവരണത്തിന്റെ ലക്ഷ്യങ്ങളെ അട്ടിമറിക്കുന്നതാണെന്നു് അദ്ദേഹം ചൂണ്ടിക്കാട്ടി.

സംവരണ ലക്ഷ്യങ്ങളെ അട്ടിമറിക്കുന്ന മുന്നാക്ക സമുദായ സംവരണ നയം പിൻവലിക്കുക, സമഗ്രമായ സംവരണ നയം ആവിഷ്‌ക്കരിച്ച് കാലോചിതമായി സംവരണം പരിഷ്‌ക്കരിക്കുക. ദലിത മുസ്ലീങ്ങൾ, ദലിത ക്രൈസ്തവർ, മറ്റു ശുപാർശിത വിഭാഗങ്ങൾ എന്നിവരെ പട്ടികജാതികളായി ഉൾപ്പെടുത്തുക, സംവരണത്തിനുള്ളിലെ അസന്തുലിതാവസ്ഥയും അസമത്വവും പരിഹരിക്കുക, പാർലമെന്റിലും നിയമസഭകളിലും, വനിതകൾക്ക് മൂന്നിലൊന്ന് സീറ്റുകൾ സംവരണം ചെയ്യുക, സാമ്പത്തിക സമത്വവും തൊഴിലും മനുഷ്യാന്തസ്സും ഉറപ്പുവരുത്തുന്ന വികസനനയംകൊണ്ടുവരിക തുടങ്ങിയ ആവശ്യങ്ങൾ ഉന്നയിച്ചുകൊണ്ട് സമാജവാദി ജനപരിഷത്ത് സെക്രട്ടേറിയേറ്റിനു മുമ്പിൽ സംഘടിപ്പിച്ച സത്യാഗ്രഹം ഉദ്ഘാടനം ചെയ്തു സംസാരിക്കുകയായിരുന്നു അഡ്വ. ജോഷി ജേക്കബ്.


സാമൂഹികമായ കാരണങ്ങളാൽ പിന്തള്ളപ്പെട്ട വിഭാഗങ്ങളുടെ പ്രാതിനിധ്യം ഉറപ്പാക്കുകയാണു് സംവരണത്തിന്റെ ലക്ഷ്യമെന്നും ദാരിദ്ര്യവും തൊഴിലില്ലായ്മയും പരിഹരിയ്ക്കേണ്ടത് വികസന നയത്തിലൂടെയാണെന്നും മുഖ്യപ്രഭാഷണം നടത്തിയസംസ്ഥാന ജനറൽ സെക്രട്ടറി എബി ജോൺ വൻനിലം പറഞ്ഞു.

സംസ്ഥാന ഉപാദ്ധ്യക്ഷൻ എം.എൻ. തങ്കപ്പൻ ആദ്ധ്യക്ഷം വഹിച്ചു. ജില്ലാ കൺവിനർ നെയ്യാറ്റിൻകര ബിനു സ്വാഗതവും രാജു കക്കാടംപള്ളി നന്ദിയും പറഞ്ഞു.



2017/07/08

സുരേഷ് നരിക്കുനിയുടെ പിതാവു് ഗോപാലൻ നായർ അന്തരിച്ചു


സമാജവാദി ജനപരിഷത്ത് സംസ്ഥാന നേതാവു് സ. സുരേഷ് നരിക്കുനിയുടെ പിതാവു് കാവുംപോയിൽ വള്ളിക്കാട്ടു്, മലയിൽ ഗോപാലൻ നായർ 2017 ജൂലൈ 5 ബുധനാഴ്ച അന്തരിച്ചു. 94 വയസ്സായിരുന്നു.

സംസ്കാരം പിറ്റേന്നു വ്യാഴാഴ്ച നടന്നു. സമാജവാദി ജനപരിഷത്ത് സംസ്ഥാന-ജില്ലാ നേതാക്കൾ അന്ത്യോപചാരം അരപ്പിയ്ക്കാനെത്തിയിരുന്നു. സംസ്ഥാനസമിതിയംഗം സ. അഡ്വ. കുതിരോട്ടു പ്രദീപൻ, സ. ജോസ് വേളാശേരി എന്നിവർ സംസ്‌കാരച്ചടങ്ങിൽ പങ്കെടുത്തു. സമാജവാദി ജനപരിഷത്ത് സംസ്ഥാനപ്രസിഡന്റ് വിനോദ് പയ്യട വീട്ടിലെത്തി സംസ്ഥാന സമിതിയുടെ അനുശോചനം അറിയിച്ചു. സമാജവാദി ജനപരിഷത്ത് ദേശീയ നേതാവും മുൻ പ്രസിഡന്റുമായ സ. ജോഷി ജേക്കബ്ബിനും സമാജവാദി ജനപരിഷത്ത് സംസ്ഥാനസമിതിയ്ക്കും സംസ്ഥാന ജനറൽ സെക്രട്ടറി സ. എബി ജോൺ വൻനിലത്തിനും വേണ്ടി പുഷ്പചക്രം സമർപ്പിയ്ക്കപ്പെട്ടു.

പത്മാവതിയമ്മയാണു ഭാര്യ. കമലാക്ഷി, ശശികുമാർ (കൊല്ലം) സുരേഷ് നരിക്കുനി, ജയാനന്തൻ എന്നിവർ മക്കളാണു്.

2017/05/01

സമാജവാദി ജനപരിഷത്ത് കമൽ ബാനർജി ദേശീയ പ്രസിഡന്റ്, അഫ്‌ലാത്തുൻ ജനറൽ സെക്രട്ടറി


കമൽ ബാനർജി


അഫ്‌ലാത്തുൻ

ജടേശ്വർ, (ജൽപായിഗുഡി ജില്ല, പശ്ചിമ ബംഗാൾ): സമാജവാദി ജനപരിഷത്തിന്റെ പതിനൊന്നാം ദ്വൈ വാർഷിക ദേശീയ സമ്മേളനം പുതിയ ദേശീയ പ്രസിഡന്റായി അഡ്വ. കമൽ ബാനർജിയെയും (പശ്ചിമ ബംഗാൾ) ജനറൽ സെക്രട്ടറിയായി അഫ്‌ലാത്തുനിനെയും (ഉത്തരപ്രദേശ്) രണ്ടു് വർഷത്തേയ്ക്കുള്ള ദേശീയ നിർവാഹക സമിതിയെയും തെരഞ്ഞെടുത്തു. പുതിയ ദേശീയ നിർവാഹക സമിതിയോഗംചേർന്നു് വൈസ് പ്രസിഡന്റുമാരായി അഡ്വ. നിഷ ശിവുർക്കർ മഹാരാഷ്ട്രം),ലിംഗരാജ് ആസാദ് (ഉഡീഷ) അജയ് ഖരെ (മദ്ധ്യപ്രദേശ്) എന്നിവരെയും ഖജാൻജിയായി ചന്ദ്രഭൂഷൺ ചൗദ്ധരിയെയും (ഝാർഖണ്ഡ്) സംഘടനാ സെക്രട്ടറിയായി രഞ്ജിത് റായിയെയും (പശ്ചിമ ബംഗാൾ) സെക്രട്ടറിയായി ഫാഗ് റാമിനെയും (മദ്ധ്യപ്രദേശ്) തെരഞ്ഞെടുത്തു. കേരളത്തിൽനിന്നുള്ള അഡ്വ. ജോഷി ജേക്കബ്ബ് ദേശീയ നിർവാഹക സമിതിയംഗമാണു്.
ജോഷി ജേക്കബ്ബ്

പശ്ചിമ ബംഗാളിലെ ജൽപായിഗുഡി ജില്ലയിലെ ജടേശ്വർ നഗരത്തിൽ സോഷ്യലിസ്റ്റ് നേതാവ് ചിത്തഡേയുടെ പേരുനല്കിയ സമ്മേളന സ്ഥലത്ത് ഏപ്രിൽ 29, 30 മെയ് 1 തിയ്യതികളിലായാണു് ദേശീയ സമ്മേളനം നടന്നതു്. സ്ഥാനമൊഴിയുന്ന ദേശീയ പ്രസിഡന്റ് അഡ്വ. ജോഷി ജേക്കബ്ബിന്റെ അദ്ധ്യക്ഷതയിൽ ചേർന്ന സമ്മേളനം പ്രമുഖസോഷ്യലിസ്റ്റ് ചിന്തകനായ സച്ചിദാനന്ദ സിൻഹയാണു് ഉദ്ഘാടനം ചെയ്തതു്.

പുതിയ ജനറൽ സെക്രട്ടറി അഫ്‌ലാത്തുൻ, മഹാത്മാഗാന്ധിയുടെ പേഴ്‌സണൽ സെക്രട്ടറിയും സ്വാതന്ത്ര്യസമരസേനാനിയുമായിരുന്ന മഹാദേവ ദേശായിയുടെ മകനായ നാരായണദേശായിയുടെ മകനാണു്.